يا أخي الكورة دي عجيبة جدا وبتقدر تحرك المشاعر بشكل تلقائي.
منتخب جزر القُمر يفقد ال ٣ حراس مرمى بتوعه، وميبقاش عندهم حارس، ويضطروا يخلوا مدافع الفريق يقف جول، ويعملوا ماتش كبير قدام الكاميرون ويصمدوا ويخسروا بفرق جول.
الحارس في الصورة اللي تحت، هتلاقي داخل عليه لاعب الكاميرون في انفراد، ولانه مدافع مش حارس فمتعود لما يدخل عليه لاعب يلم ايده ورا جسمه علشان الكورة متجيش في ايده، فتلاقي نفسك بتقول يا عيني! مش متعود يكون جول، وعلشان كده مش فارد دراعه علشان يصد الكورة.
وبشكل تلقائي تحس انها قصة ملحمية وتلاقي مشاعرك بتتحرك، وتشجعهم وتساندهم.
الصورة التانية أبو جبل والشناوي بيحضنوا بعض بعد الماتش، فأنت ورغم انحيازاتك لفريقك تلاقي نفسك مبسوط من الصورة، وبتقول الله!
وتلاقي مشاعرك اتحركت وانحيازاتك بتتجنب، وتتبسط وتضحك.
الكورة اللي فيه ناس بيقولوا عليها حاجة تافهة، حقهم يشوفوها كده هما أحرار، بس الكورة من الحاجات القليلة جدا، اللي بتقدر تحيد الانحيازات أحيانا، وبتقدر تحرك المشاعر بسهولة وصدق.. وعلشان كده بنحب كرة القدم.
